سعودی فنڈ فار ڈیولپمنٹ نے پاکستان کے لیے 3 ارب ڈالر ڈپازٹ کی مدت میں تیسری بار ایک سال کی توسیع کر دی۔العریبہ نیوز نے پاکستان کی وزارت خزانہ کے حوالے سے بتایا ہے کہ سعودی عرب کے 5 دسمبر 2024 کو میچور ہونیوالے 3 ارب ڈالر ڈپازٹ کی معیاد 6دسمبر کو ختم ہو رہی تھی۔
پاکستان کی بیرونی قرضوں میں توسیع کے حوالے سے یہ پہلی پیش رفت ہے۔أئندہ سال جون تک سعودی عرب، یو اے ای اور چین کو 13ارب ڈالر کے قرضوں کی واپسی سے بچنے کیلیے پاکستان کو ادائیگیوں میں توسیع لینے کی ضرورت ہے۔
العریبہ نیوز کا مزید کہنا ہے کہ 2 ارب ڈالرکا ایک اور سعودی ڈپازٹ آئندہ سال جون میں میچور ہو رہا ہے، جس کی واپسی پاکستان کیلیے ممکن نہیں، اس لئے پاکستان اس میں بھی توسیع حاصل کرنے کی کوشش میں ہے۔
اس کے علاوہ متحدہ عرب امارات کا تین ارب ڈالر قرض بھی جلد میچور ہو رہا ہے، آئندہ چھ ماہ میں پاکستان نے چین کو تقریباً 8 ارب ڈالر کی ادائیگیاں کرنا ہیں جس میں کیش ڈیپازٹ شامل ہیں۔
پاکستان اور آئی ایم ایف دونوں ڈیفالٹ سے بچنے کیلئے قرضوں کی معیاد میں توسیع کی پالیسی پر عمل پیرا ہیں، تاہم یہ پالیسی صرف چین، سعودی عرب اور متحدہ عرب امارات تک محدود ہے۔